【Viu】Cath黃妍聽日（14日）推出新碟《4891》連小說，而喺噚日佢就搞咗個分享會，即場獻唱新歌《哀傷的作者》，個live簡直冇得彈呀！Cath指新碟個靈感係取材自村上春樹《1Q84》，小說部分特別同老友兼長期partner王樂儀合寫，收到order要喺兩個星期內起貨，佢都大嗌超大壓力，所以笑話寫小說只係為興趣。
完成英國tour嘅Cath話好感動，不過一開始到埗係有被jet lag打倒，唱完個騷就勁眼瞓！講到佢喺巡演喪爆喊，Cath抵死笑話因為當地太乾燥、太大風，強調只係吹沙入眼先唔小心流眼淚，又笑指當下都冇諗過咁大沙塵暴，自認比較少會喺咁忘我狀態之下崩壞，英國fans睇到Cath不為人知嘅一面，張飛值回票價啦！
