【Viu】啱啱去完日本旅行叉電嘅Ian陳卓賢，今日化身「模特賢」同沈月、孖仔湯君慈同湯君耀出席珠寶活動，除咗露兩手晒首飾外，仲「露多兩手」Free style跳《前傳》，可愛爆燈呀！事緣姜濤最近翻煲《全民造星》後，話睇到25集都「見唔到」Ian，Ian即笑晒話自己當年跳舞唔叻，所以拍《前傳》時冇乜鏡頭，到中後段先開始被發現！
講到明年solo演唱會，Ian既興奮又緊張，又話自己隨時Ready，下星期開都得㗎！除咗想多啲舞台實戰經驗，Ian仲幫Jeremy「公開爭取」開solo concert！然後又提到佢幫AK寫新歌，搞到Tiger都想搵佢邀歌，Ian就話只要隊友私底下開聲搵佢，都一定會幫手，仲暗示可能嚟緊會幫姜濤寫歌添！
