【Viu】Endy周國賢、湯君慈同湯君耀今日出席手錶活動，Endy話年紀越大就越珍惜「時間的初衷」，開始儲吓靚錶，但笑言最貴嘅錶都係幾廿萬……韓圜啫！講到下月初嘅處男紅館騷，Endy話最緊張唔係唱歌，而係要「征服」四面台，因為自己方向感好差，喺屋企都會迷路，咁佢屋企都幾大喎！而為免得失朋友，佢就冇請嘉賓，但預告每晚都有不同歌單。至於飛債，Endy拒做「分飛燕」，最驚阿媽拖埋9兄弟姊妹連孫仔孫女嚟捧場，搞到自己好緊張。咁兩個囡囡會唔會上台表演？佢就話隨緣喇，但曾經係Band仔嘅周爸爸就好想上台表演，好期待呀喂！
此外，湯君慈同湯君耀間凍肉舖生意唔錯，兩位「小鮮肉」賣凍肉仲吸引一班師奶熟客，會傾電話同影相畀佢哋睇，相當搞笑！
