【Viu】Ian陳卓賢、Edan呂爵安、洪嘉豪、Gordon Flanders、Ivana王菀之同崔展鴻等，噚晚為《HKT西九音樂節》演出，適逢愚人節，Edan再度整鬼現場觀眾，聲稱要因病缺席，但醒目嘅Fans都冇「拉隊脫粉」，期間Edan仲戴上蝴蝶結跳唱Lolly Talk嘅《三分甜》，High爆全場！至於Ian亦心情大靚，不斷Encore飲水享受尖叫聲，唱《地球上的最後一朵花》時，仲化身「陳Sir」教全場觀眾「Hoah-eh-oh-eh-oh」。
Ian坦言對今次「個人馬拉松」有啲緊張，事關係第一次連唱6首歌，仲希望同公司爭取今年開個人演唱會。講到AK經常上載拍攝《冰上火花》嘅英姿，Ian笑言自己都珍藏大量型爆短片，但廢事po出嚟，令AK冇面就唔好啦！至於Edan就自誇跳《三分甜》冇難度，一來自己唔係行靚仔路線；二來扮嬌俏最耍家。
此外，嘉豪同Gordon合唱時掃背兼拖手，但兩人都笑言冇下次！不過，嘉豪揚言接受拍BL劇，仲mark實MC同Jeffrey做對手，好識補身喎！
