為達至最佳瀏覽效果，請更新至最新的瀏覽器版本。
如有問題，歡迎電郵至 pccwmediaiapps@pccw.com 查詢。
張敬軒一連三場於英國倫敦殿堂級場地Royal Albert Hall嘅演唱會來到尾場，一如頭兩場，軒仔除了唱出多首耳熟能詳歌曲，亦不時同歌迷觀眾互動。而呢晚演唱會焦點係壓軸歌曲，軒仔唱出由自己作曲、黃偉文 (Wyman) 填詞，仲未發佈嘅新歌《隱形遊樂場》。呢首歌原來超級新鮮，由收到Wyman嘅填詞到編曲，軒仔喺台上高歌，前後唔夠24小時。
呢首《隱形遊樂場》原來係Wyman送畀軒仔嘅禮物，歌詞更係Wyman尾場前一晚嘅半夜時分，親自送到酒店畀軒仔，絕對係新鮮滾熱辣。演唱會上軒仔解構歌曲由來，原來去年十月收歌回來後，本想請Wyman填詞，Wyman反建議佢親自作曲，軒仔：「咁我寫呀寫，寫到年底中咗covid都未寫。」
直至出發倫敦前，軒仔把曲作好，「寫呢首歌嘅時候有一種好強烈嘅孤獨感，呢幾年嘅疫情，成個世界包括我哋生活環境嘅轉變，我成日睇住啲新聞都會有一種抖唔到氣嘅感覺，於係我將呢首歌嘅demo name咗做《Goodbye》，因為我想同呢種唔鍾意嘅無力感say goodbye。」隨後便將歌曲發給Wyman，「直到噚晚，我返到酒店收到一個淺藍色嘅信封，係阿Y送俾我一份倫敦嘅紀念品，亦都係送俾香港人嘅一份手信，多謝阿Y。去到Wyman手上，佢總係可以將一啲negative嘅嘢開出花來。」
有了歌詞，不足24小時就編好曲，軒仔於是喺尾場送合Wyman及倫敦樂迷，「好彩我身邊有位『編曲俠』，因為佢冇預到今次喺倫敦會做一啲同音樂好相關嘅嘢，佢喺冇鋼琴、冇任何樂器嘅輔助下，就幫我編完咗呢首歌。今晚，我想做一件我人生從未做過嘅事，好驚呀！今晚我哋喺倫敦Royal Albert Hall呢度，做一個我新歌嘅preview！」
軒仔及團隊已經於倫敦book好錄音室灌錄這首新歌，相信香港樂迷好快聽到成品。軒仔坦言首歌係一份珍貴禮物，「一直以嚟Wyman交詞都係fax或者email，但今次佢拎嚟酒店畀我，真係好感動，好多謝佢咁錫我，呢份係一份好珍貴嘅禮物。」
喺演唱會上，大批歌迷送禮物畀軒仔，完場後，歌迷仍唔捨得離開，超過2000歌迷喺會場出口守候，歡送軒仔。
【軒仔同歌迷喺演唱會上爆笑對話節錄】
軒仔：「咩嚟㗎入面，咁重嘅？」
歌迷回答花束內裝了水。
軒仔：「嘩！送花送埋水，如果同你結婚你咪送埋大床？你啲機會唔使留畀我呀，留畀第二個得㗎啦，多謝你。」
另一歌迷送上一支花！
軒仔：「好手緊喎呢排，吓？你錄緊㗎？哦！冇呀，我話好靚呀，我未見過彩虹色嘅玫瑰呀，唔，好香呀。」
有歌迷向軒仔送上獎座，軒仔讀出獎座上嘅字，「張敬軒我最喜愛男……朋友，不如畀番你吖，唉～ 咁識佔人便宜嘅而家啲女仔，仲要個座係黑色大理石、金色字咁樣……」
有歌迷送上一個榴槤！
軒仔：「恭喜你呀，你一定係史上第一個進入Royal Albert Hall嘅榴槤啦，你威過我呀而家。諗唔到我呢個光環就咁俾佢搶咗。」
連串舉動及對話令全場歡呼兼爆笑。
