【Viu】「師奶殺手」陶大宇噚日趁人日落區派飯做善事，又喪玩selfie來者不拒！前年翻唱《倒轉地球》hit爆全城，但今年陶大宇就話冇專登錄唱賀年歌，反而係匿埋同朋友唱k、搶廚房玩煮飯仔兼小賭怡情吓，佢仲搞笑自爆贏咗百幾蚊就即刻割禾青，發個小新年財都開心咁話！
陶大宇指今年準備咗5位數字嘅利是，咁去拜年少不免被催婚，佢直言唔心急，會搵個好嘅timing先結婚：「有生之年，（成家）先係個完美嘅人生，唔想自己做孤獨精。」不過佢就預告今年就冇機會拉埋天窗，再爆金句：「我依家冇，但將來會有！」咁或者下年陶大宇就派雙封利是呢！
