【Viu】大宇哥一出，便知有沒有！今日陶大宇倒轉屯門，出席消費平台活動，吸引唔少街坊圍觀，個個都爭住要同佢影相喎，師奶殺手果然仲有魅力呀！不過小編有啲失望囉，今日大宇哥哥冇唱歌仔，不過佢都有扮招牌水撥手勢，撥吓撥吓咁滿足現場街坊，係正嘅！問大宇哥今日點解唔表演吓歌喉，佢話：「今日唔喇！睇後面個mon已經播咗主題曲，其實唱歌真係唔係我主打，本來客戶都打算另搵人唱主題曲，但佢哋又話不如俾我玩吓，原來我都handle到喎！今日見啲確診數字又升返，我都擔心唔可以如期完成呢個活動，好彩都冇事。」
早排大宇哥同保錡上谷德昭主持嘅《爆谷一周》做嘉賓，佢哋年齡上個gap雖然相差27年，不過都冇乜代溝喎！「我覺得呢個年輕人好有活力，唔好話我影響到佢，佢都影響到我，佢令我覺得冇隔膜，我同佢嘅思維諗嘢都好接近。而且佢扮我好有心，我問佢條片真係睇咗100次先扮我，佢話係，呢種幹勁以前我都冇，唉！得㗎啦！所以我好欣賞佢。」咁有冇機會堅合作先？大宇哥話未知呀！不過佢話知道好多人都想喎！嚟啦！來吧倒轉保錡！
