【Viu】張敬軒喺會展舉行嘅聖誕跨年騷《REVISIT演唱會》，最重要嘅環節當然係倒數啦！噚晚平安夜，軒公由9點半開場唱到凌晨，同大家一齊倒數迎聖誕 ，仲連環Encore三次，差唔多成點鐘先散場，搞到fans鬼咁開心！經常有「手作仔」送俾軒公嘅死忠男fans當然都在場啦，今次仲帶咗份大禮嚟添！今次佢就做咗把「軒弓」，係一把膠雞加上雞毛掃嘅弓，弓上面仲寫住「軒弓一發射全心」，認真抵死！軒仔都忍唔住問佢係咪電視台做道具出身，仲話：「我好想自己係觀音菩薩，有個葫蘆可以收咗你。」真係笑爆嘴！
另外軒公23號舉行第3場演唱會當晚，亦係《Yahoo搜尋人氣大獎2022》頒獎典禮，獲得3個大獎嘅軒公雖然冇親身出席頒獎禮領獎，但呢晚軒公喺台上都收到澱粉自製嘅紙扎《我最喜愛男歌手》大獎，攞獎後軒公表示：「多謝聖誕流流送個紙扎比我，好靚我會放係我studio，多謝你！無論今年上唔上台，有冇獎攞，我當我自己攞咗㗎啦！反正現場觀眾都係差唔多咁上下人數！多謝大家！」全場歌迷即刻歡呼拍掌，其後軒公獻唱《我的天》嗰陣，現場仲一齊大合唱，氣氛好到爆啊！
