【Viu】《Yahoo搜尋人氣大獎2022》頒獎典禮噚晚盛大舉行，超過半百個得獎單位出席，簡直係星光熠熠！數到打扮得最sexy一定就係女團COLLAR嘅三位fit爆成員IvySo、Winka同Candy，佢哋套貼身裙真係吸啖空氣都奢侈！而正開緊會展跨年騷嘅張敬軒就冇出席，佢除咗攞「人氣音樂企劃」、「人氣專輯」之外，仲同鄭欣宜分別擸走「本地男、女歌手」獎，至於欣宜再攞埋「跳唱歌曲」、「十大人氣歌曲」。
講到大贏家啦喎⋯就真係非男團MIRROR莫屬，團獎加埋5位成員姜濤、Edan、Jer、Ian同Anson Lo嘅solo獎，合計12個大獎！個人獎方面以腳傷缺席嘅姜濤攞4獎最多，但喺之後嘅頒獎禮姜Admin會唔會現真身都仲係未知！
而是晚亮點落喺Edan同緋聞女友袁澧林撞髮色度，佢即刻急搵類近髮色嘅Jer求救，再解釋原來染髮係因為拍新歌MV，除夕晚推出送畀咁多位「爵屎」！繼而提起「小Edan」被姜濤踢咗吓，Edan霸氣咁答：「很堅強！」另一pair「撞樣」嘅就係Anson Lo同馮素波，教主話被模仿覺得好榮幸，至於會唔會同波姐影番輯「孖生」相就後話啦！
另外，「六膠」憑《膠戰》主題曲《膠on！》奪「人氣電視節目主題曲」，佢哋揚言會再出歌攻紅館，又講起最大競爭對手就係即將闖樂壇嘅Jeffrey，不過阿正好快就話要跟隊出歌，一圓同「愛人」成「一對新人」私願！佢哋唔少得有分享正如火如荼咁拍緊《膠戰S3》，最後阿正仲捉緊時間招親添！
