【Viu】由毛舜筠、謝君豪、Edan呂爵安、談善言、袁澧林以及Anson Lo盧瀚霆主演嘅電影《過時·過節》，反映唔少香港家庭嘅縮影。問到豪哥同阿談印象最深刻嘅一場戲，一定係一家人鬧交嗰一場，豪哥激動到要「立」刀，導演仲搵咗武指監場，就知幾大陣仗啦！第一次拍劇情片嘅Edan事前超緊張，不斷向兩位前輩取經做功課啊！其中一幕，豪哥仲要掌摑Edan，為咗力求逼真Edan都千叮萬囑，叫豪哥千祈唔好留手，最後導演兩Take就收貨喇！
而今次都係第一次同毛姐合作，佢都被對方嘅超強大氣場懾親啊！而且難得有機會睇到金像影后同金馬影帝喺片場過招，阿談就算唔使開工，都會特登留喺度偷師，真係超好學啊！
