【Viu】「亞視一姐」阿儀薛影儀，今日現身高等法院，就3月22日於屯門法院被判罪成需即時入獄14日嘅普通襲擊進行上訴。法官表示批准上訴，結果維持14日監禁，但緩刑18個月，即係如果期間冇再犯事就唔使入獄，你睇阿儀同經理人Connie行出法院個表情，就知鬆晒！事發於舊年，阿儀喺元朗寓所嘅屋苑範圍入面，俾一名女街坊追住佢3分幾鐘拍片，指控佢冇戴口罩，其間阿儀對街坊起飛腳，最後街坊報警。
亞視就呢單案為阿儀上訴至高等法院，今日法官喺庭上睇完阿儀事發時嘅片後，認為拍片者反應過擊，「如果影人目的係搜集證據，唔使追人九條街，大可即刻報警。我知冇戴口罩係冇公德心，但拍片者除咗不只一次講粗口，話人身形肥，係侮辱，仲要追人三分鐘，佢做咗咩天大惡事？將心比己你會唔會都好嬲？」而當控方律師形容拍片者為「受害人」時，法官重申：「邊個係受害人？相信辯方律師應該都有另一個角度。」控方律師喺結案陳詞時，亦針對阿儀「曾有案底」呢個理據，但法官卻說：「10年前做錯過，但之後冇再犯事係咪應該俾返credit佢？因為有一個案底係咪加刑因素？唔係加刑理由。」
