【Viu】今日係女團Lolly Talk拍攝新一首歌MV嘅大日子，亦係成員Yanny嘅23歲生日，確真係好日呀！其餘7位成員貼心為壽星女送上驚喜蛋糕兼禮物，點知Sinnie踢爆MeiMei係豬隊友，事關MeiMei喺噚日錄音嗰陣唔覺意爆咗有蛋糕呢個秘密，變相Yanny係一早知情！不過都無損佢收蛋糕嘅雅致，仲許下Lolly Talk大紅大紫嘅生日願望！
講番今日拍MV，Sinnie預告新歌走R&B曲風、又係一首跳唱歌，仲大賣關子咁話同上次《三分甜》一樣有邀請到唔同嘉賓客串，同時Tania終極劇透話請咗一位「枕頭嘉賓」，想知係邊個？記住之後留意我哋嘅詳細報導同Lolly Talk嘅新歌MV啦！
