【Viu】香港科幻電影《明日戰記》最新衝破5700萬票房，甚至攀上本地史上最賣座華語片第7位！監製及主演嘅古天樂噚日受訪表示好開心，希望可以刷新新嘅華語片記錄！問到點慶祝？古仔話等電影宣傳完先再諗，又預告下星期會有個消息宣布，詳情方面佢就大賣關子，追問係咪會出卡通版？續集？佢一率封口，至於《明》會唔會喺台灣上映？會報名參加金馬獎？佢話：「疫情都幾嚴峻吓，盡量留番喺香港。」
同場仲有型男馮德倫，講到佢最近進出錄音室，係咪想重返樂壇先？佢解釋只係為珠寶品牌錄audio，而另一次就係為鄭秀文嘅電影歌錄一句對白，出歌啦喎⋯佢笑話係反而睇有冇唱片公司對佢有興趣，如果要行自資路線就先嗌老婆舒淇出碟試水溫，即係ladies first意思？提到舒淇大爆佢回歸演員崗位，佢指唔係一個部署，不過就真係多咗劇本邀約！
