【Viu】《尾二一屆口罩小姐選舉總決賽》噚晚圓滿舉行！12強佳麗施展渾身解數，鬥才藝鬥身材，最後由60號聞西 （梁茜童）奪得冠軍及5萬蚊現金獎，而MK同馬小玲就成為今屆嘅亞軍同季軍！一直被視為大熱門嘅師姐王詠珩，雖然最尾三甲不入得梗頸四，不過就有唔少網民力撐師姐，所以就攞埋民選投票嘅「網絡最受歡迎口罩小姐」同埋「最佳自選造型」兩個獎項，都有1萬蚊獎金落袋㗎！仲有網民分析話師姐輸在問答環節回答得太行貨，冇辦法令評判對佢留下深刻印象！所以話決賽嘅三位評審張敬軒、谷德昭同王丹妮絕對係公正嚴明！
而決賽當晚，仲有軒公同ERROR擔任表演嘉賓，分別唱出《騷靈情歌》同《愛情值日生》！唔好話觀眾喇，連評審之一嘅Louise都聽得超投入啊，完騷後仲分享佢今次做評審嘅興奮心情添啊！
