【Viu】喺《全民造星III》攞冠軍嘅折骨Ben趙祥誠，上星期推出咗第一首單曲《粉身碎骨》，第一次擁有真正屬於自己嘅歌同MV，BenBen嘅心情當然好興奮啦，「以前參加比賽時都係團體合作，而今次MV由歌曲到所有場景、服裝，台前幕後都係為我而做，感覺好『正』！我要非常多謝所有工作員和設計今次MV故事嘅團隊，辛苦晒大家！」MV由於場景布局多變，除咗有Ben耍家嘅折骨舞，MV亦加咗武術元素，拍足24小時，Ben今次仲一嘗吊威也嘅滋味，「下半身被威也戚住，大髀位有啲痛，加上我本身有畏高，心情好緊張。有啲動作以為自己OK，但其實係NG，吊住嘅時候因為手腳都離地，頸和腰都要更加出力，為咗做啱表情，我忘記咗畏高嘅恐懼。雖然吊威也超級難，但自小睇古裝劇、電影、科幻戲，見到演員吊威也，我一直都好想嘗試，今日終於成就解鎖！」
