【Viu】Happy Anson Lo’s Day！終於嚟到「教主」Anson Lo嘅大喜日子，27歲生日！今日去到中環、銅鑼灣、尖沙咀同大家直擊海、陸、空嘅生日應援站，一齊嚟慶祝「教主誕」！
大批「神徒」冒烈日喺中環摩天輪排隊，雖然最少排一個鐘，但仍然有唔少人一家大細到場，現年11歲嘅小神徒盧巧恩同7歲細妹巧琳仲即席跳《Megahit》，相當可愛！60幾歲嘅楊小姐同張小姐完全唔擔心體力問題，諗住玩足全日。雲妮同Quota除咗DIY應援扇，仲對住鏡頭瘋狂示愛，真係7歲至70歲都抵受唔住教主魅力呀！
除咗免費搭摩天輪，FC都請全港巿民免費搭小輪，神徒們喺「神之小輪」起勢打卡，仲有唔少男神徒添！22歲嘅Wizky話追星無分性別，男仔都可以欣賞靚仔，又啱喎！一落船就去到尖沙咀天星碼頭，一早就滿佈着住粉紅色衫嘅「神徒」，成群結隊咁拎住小AL打卡，場面爆墟冚！FC會長Annie同Peggy受訪嗰陣表示準備咗10萬個襟章、主題貼紙「Giving Day」免費派畀「神徒」，同場亦有「神徒」自發性製作生日應援物，大家都好有愛呀！
而另一班「神徒」就舉辦一連三日嘅生日相展，展出極大量嘅AL靚相，主辦之一嘅Chiuma透露籌備咗差唔多兩個月嘅時間，笑話揀相揀到頭到大埋，因為實在太多靚相，有興趣嘅就記得預約參觀啦！
