【Viu】教主出沒！神徒請注意！仲有唔夠三日就係教主Anson Lo 7月7號生日嘅大日子，神徒們一早已經為教主安排咗鋪天蓋地嘅生日應援活動，仲將尖沙咀海傍變成粉紅色嘅教主碼頭！唔好講神徒啦，就連教主自己都好心急想嚟打卡，噚晚仲喺IG Story po咗張手繪畫模擬自己企喺大芒前影相。點知點知！！！今朝10點半佢真係喺碼頭現真身，搞到喺現場打卡嘅神徒驚喜到爆啊！雖然教主戴晒漁夫帽同口罩，但現場廿幾位神徒都秒速認出教主，仲把握機會親口同教主講生日快樂添！寵粉霆都好Nice好有禮貌咁同神徒點頭講多謝，真係好sweet啊！
