【Viu】教主Anson Lo將於7月7號27歲生日，神徒今年又有咩生日應援呢？除咗教主生日正日請大家搭小輪之外，仲喺朗豪坊搞咗Pop Up Store，以「Giving Day」為名，希望回饋社會。展覽當然係以教主最愛嘅粉紅色為主，仲有七大打卡位一定唔可以錯過！首先有集結咗1800位神徒嘅相砌成嘅馬賽克牆，大家真係要落足眼力搵下自己喇；而另一邊就有唔同單曲造型嘅Little Anson公仔同手幅；當然唔少得pink pink嘅巨型扭蛋機啦；而展覽正中央仲有《King Kong》MV入面嘅非賣品水樽；如果想睇教主嘅靚仔樣，就可以去另一邊嘅Photo Wall同佢瘋狂Selfie；成個展覽另一大心思位，就係由教主親筆信打造嘅神徒專屬打卡牆，睇完封信真係好sweet sweet；最後一站梗係去瘋狂掃貨啦！樣樣都咁靚咁用心，神徒嚟到又真係好難把持得住嘅…
會長Annie透露一系列生日應援籌備咗3個月，花費7位數，驚喜仲陸續有嚟添呀！今次展覽嘅收益扣除成本後，會捐畀唔同慈善機構，為善最樂！笑問想唔想教主好似舊年生日咁突擊打卡？Annie就話唔好呀，驚商場陸沉咁話！
而星級神徒Kakaball喺廿四孝阿爸張繼聰嘅陪同下，星期日已經率先去到尖沙咀碼頭朝聖，仲引到Anson Lo留言話「叫埋我嘛」，kakaball知道實好開心啫！
