【Viu】關心妍出道20週年演唱會噚晚喺紅館演出頭場！唔少圈中人包括張敬軒、鄭伊健蒙嘉慧、古巨基、張柏芝等都有送上花籃為阿Jade打氣！而老公楊長智就同蔡一傑、蔡一智夫婦、羅傑承一齊坐喺台下睇騷！阿Jade呢晚除咗以超高叉閃裙性感登場，仲換上多套靚衫，其中呢條藍天白雲裙係價值6位數嘅高級訂造服，認真重本啊！而呢晚演出阿Jade唔單止準備咗鋼琴自彈自唱，仲苦練色士風大騷音樂才華，不過講到最驚喜嘅一part，梗係佢拖住5歲囡囡心心一齊合唱《SMILE》啦！心心唔單止冇怯台，仲表演佢拿手嘅翻筋斗，令台下嘅哥哥姐姐拍爛手掌啊！而呢晚演出最大嘅洋蔥位，就係阿Jade向媽媽真情剖白，多謝佢多年嘅養育之恩，仲亦罕有地講到佢對爸爸嘅感受，一度眼濕濕！除咗囡囡心心，阿Jade仲請嚟「同年新人」蕭正楠合唱佢哋當年嘅經典情歌《特別鳴謝》，隔咗廿幾年再同台合唱，係集體回憶呀！
