【Viu】阿Jer柳應廷今年會按慣例推出三部曲作品，而今次佢就一改曲風唱情歌，令大家都好驚喜啊！而首部曲《離別的規矩》噚晚MV大首播，今次新歌故事講述情侶由甜蜜到分開嘅故事，演繹熱戀期嗰陣，Jer當然同女主角許月湘有唔少互動同親密舉動啦，剪頭髮、餵食嘢等等，不過亦有另類放閃噃，就係同獨角仙互動嘞！而甜蜜過後，Jer同許月湘呢對小戀人最後都係嘈交分手，Jer奪門而出，仲坐喺門外流下男兒淚添啊陰公！而呢一幕，Jer都話係一個挑戰，但其實佢拍第一Take嗰陣，已經感情豐富到流咗眼淚，但力求完美嘅佢想再嚟一次，聽住《離別的規矩》培養情緒，不出30秒Jer已經爆喊，情緒仲一度難以平伏，雙眼喊到腫晒！結果只係拍咗兩Take就完成，勁叻豬！
