【Viu】講起KB李健宏，大家可能會話佢係電視主持人，識得佢耐嘅會知道佢仲係位鼓手音樂人，後來又開始經營YouTube Channel，成為香港初代KOL，同時佢仲係個生意人，總之就係瓣數多到數唔曬！不過講到佢當初點樣成名，一定唔可以唔提，佢嘅長壽網絡節目《情義兩難全之玩爆你個腎》，連Edan都曾經試過俾佢整蠱！後來又喺機緣巧合之下，俾佢展開靈探之路，喺網上掀起話題，真實撞鬼經歷真係分分鐘嚇破你個膽！成名後KB更加踩入電視圈，成為《真PK》系列主持，但亦令佢一度忘記初心！喺疫情底下，佢決定重返網絡，搵返佢嘅使命，為香港人繼續帶嚟源源不絕嘅精彩節目！
