【Viu】今日7月7號係Anson Lo 31歲生日嘅大日子，Happy呀！Lo Lo喺5號參與完盧瀚霆國際後援會為佢舉行嘅《Amour ♡ Love L’Amour de la Fête 生日會》後，換件衫就由亞博直奔去後援會準備嘅生日展，教主一去到就即刻喺「家書」上面簽名。佢打卡時表情多多，仲喺電視前跳舞，魅力爆晒燈啊！壽星仔Lo Lo亦有喺IG Story share神徒們今日去生日展、去唔同地方打卡嘅人山人海畫面，勁有愛！
而今日逾千神徒繼續以粉紅色打扮、手執印有Anson Lo頭像嘅粉紅氣球現身有「教主碼頭」之稱嘅尖沙咀碼頭，凝聚咗一片粉紅海！喺雷暴警告之下， 大家喺彩蛋出現前撐起雨遮互相照顧， 到雨勢轉弱之後，大家都收起雨遮、拎出粉紅氣球，齊聲高呼「盧瀚霆！生日快樂！」
到夜晚7點，大電視播出Anson Lo親自拍片送俾神徒嘅驚喜彩蛋：「生日快樂！咁多位神徒大家好，係咪好驚喜見到我呢，一齊唱生日歌先，三 二 一！」 Anson Lo 之後再真情分享：「最緊要係每一日都過得好有愛、互相支持，希望你哋喺追我嘅路途當中，都一定會好有愛，亦都可以攞到好多的能量啦！辛苦你哋，依家大熱天時，都仲去等我、去聽我講嘢，知道你哋都好攰、好熱，但係你哋都仲依然去守候住我，好多謝你哋！」 Anson Lo多謝大家嘅每一個祝福，喺大一歲嘅同時亦要保持年輕，並指最重要係希望接下來嘅工作同表演，都會令神徒們而感到驕傲！全場神徒先係一齊跟住唱生日歌，最後再一齊拍手歡呼大叫「盧瀚霆！Oppa！盧瀚霆！Oppa！」氣氛勁好！小編都祝Lo豬生日快樂，身體健康，快啲入嚟睇現場實況片陪教主慶生啦！
