【Viu】聽日就係Anson Lo盧瀚霆31歲生日大日子，盧瀚霆國際後援會噚晚就喺亞博舉行《Amour ♡ Love L’Amour de la Fête 生日會》，同Lo Lo率先切蛋糕，係愛呀！教主今年繼續以花車巡遊同神徒BB近距離接觸，唔少神徒沿途大叫：「Anson Oppa生日快樂！」巧冧豬呀！生日會由同係巨蟹座男孩嘅程人富任司儀，齋睇字都feel到有幾Fun！
啱先喺澳門開完兩場「KINGDOM」，Lo Lo接住就返港出席生日會，同神徒見足3日，教主冧爆話：「呢3日我嘅生命係100%充斥住神徒，完全冇咗工作呢回事，好似同神徒一齊Vacation咁，我可以拋開晒煩惱，幸福感滿滿。」教主又多謝神徒咁重視佢生日，「無論發生咩事都好，面對緊好與壞，大家都有同樣嘅目標，就係為我慶祝。好多謝你哋仲喺我出道嘅第8年，仲咁大規模為我慶生，各式各樣嘅付出，好窩心亦好感激。」
生日會又點少得Lo Lo跳唱、同神徒s玩遊戲，佢更應全場要求，飲水足足至少6次俾大家盡情影相拍片，喂呀！仲唔係寵粉之鬼！想睇教主幾有愛？仲唔入嚟睇現場實況片！
