久未公開露面嘅「雅夫人」雪梨，今晚現身《尋秦記》慰勞宴，孖「盤兒」林峯同「真阿仔」徐偉棟同場，「真假阿仔」仲齊齊錫錫媽咪，冧爆呀！雪梨姐姐話好開心可以孖兩個阿仔同場，覺得阿棟有份拍《尋秦記》電影版係好奇妙嘅緣份。至於日前驚喜現身謝票場兼錫錫古天樂，佢就笑指已經係去年嘅事，今年就唔好再提喇，講講吓仲自爆飲咗兩杯Wine搞到亂咗性，身旁嘅阿棟即刻好似𠱁小朋友咁𠱁媽咪，認真搞笑！
至於林峯就話雪梨姐姐嘅豪爽性格好有雅夫人Feel，仲自爆當年一場掌摑戲好難忘，皆因「娘親」出盡力真摑，好彩頭套冇飛甩咋！阿峯又話太太同囡囡都有捧場，但阿女睇完一啲都唔驚「大王」，皆因自己喺屋企十足十下人喎，真唔真呀？
而阿棟就憶述當年同阿妹要搵被遮眼嚟睇雅夫人被凌辱嘅戲份，依家大個翻睇當然冇事啦！咦？咁緋聞女友姚子羚又有冇捧場呢？媽咪又有冇見過真人呢？阿峯又點樣神助攻呢？睇足本訪問就知啦！
