【Viu】Kelly陳慧琳一共10場紅館騷，呢晚第2場請嚟Anson Lo盧瀚霆做嘉賓，二人合唱《深閨》，邊唱邊輕輕攬咗一下之外，Kelly仲翹住Anson Lo嘅手，好冧啊！記得2年前，Kelly做Anson Lo演唱會尾場嘉賓跳唱 《花花宇宙》，今次就唱抒情歌，一樣掂啊！
合唱完畢兩個人再抱抱，Kelly見現場眾多神徒就話：「嘩，你真係好誇張，我真係未試過請嘉賓......擺晒你啲牌出嚟，好似你開演唱會咁啊。」Anson Lo回應：「唔係唔係！」Kelly仲好sweet咁話知道阿撈上星期生日，喺台上送上一句Happy Birthday！ Kelly仲準備咗份禮物，然後拎出一件今次個唱嘅T-shirt，仲交出背脊畀Anson Lo喺件Tee上簽名，完全冇天后架子！ Kelly仲「警告」話：「要簽得靚啲啊」！原來，Kelly有「詭計」，佢話：「依家枝筆就送咗畀你，Happy Birthday，呢個 (Tee )係我嘅，呢件衫值錢，梗係攞去炒，邊個想要？我自己要！」場面搞笑！之後，Anson Lo獨唱新作《你都有今日》，又行去兩邊台同觀眾打招呼！
而今次個唱除咗係Kelly相隔10年再上紅館，亦係佢入行三十週年紀念，樂隊除咗有特登喺英國返港嘅音樂總監Mark雷頌德領軍，聯同「豹哥」單立文、黃丹儀之外，仲有發掘佢入行嘅Joey Tang，Kelly仲連同Mark、豹哥同Joey演出經典金曲《紀念日》。
四人台上暢談當年趣事，Kelly笑指主持Chill Club嘅Joey Tang同喺友台工作嘅豹哥打對台，又自嘲素顏好嚇人，影相唔可以近鏡！後來四人又自爆年齡秘密，豹哥竟然自爆年齡：「大家知唔知我今年66歲？覺唔覺我用咗成人尿片？」又笑言唔介意被叫「豹爺」。隨後Joey同Mark分別自爆62歲同56歲，輪到52歲嘅Kelly就話係人都知，但大家強調年齡不過數字，歌迷支持最珍貴，噚晚fans熱情場面更令Kelly兩度哽咽。
