【Viu】Eason陳奕迅 x 謝霆鋒 x 軟硬 x MIRROR x 張敬軒 x Joey容祖兒今晚喺亞博演出音樂會，齋睇陣容，真係未開騷先興奮！第一個出場嘅就係謝霆鋒，白背心騷麒麟臂so hot！佢一嚟就「焚」爆個場，全場觀眾完全唔使熱身，一秒進入狀態！帶嚟《玉蝴蝶》、《青空》，霆鋒話首次喺亞博演出，覺得好緊張，唔知佢下個騷有冇機會喺亞博開唱？
大晒結實腹肌嘅Joey搵埋老best軒公合唱《Make a Beat》，走勻台兩側同fans互動！軒公仲突然自爆初戀事，omg！
跟住輪到姜濤出場！佢唱完《沒有翅膀的天使》後，喺sharing嗰陣重提之前曾經喺快餐店做嘢，又指自己呢排經歷咗好多嘢，亦學懂咗啲道理：「唔係有咗先至做，係你做咗先會有！」相信之後會越嚟越好，一齊加油、唔好放棄！最後佢不忘自嘲日前西環墮海一事：「嚟緊呢首歌好有意義，因為前排發生嗰件事，知道首歌點解有呢個字《濤》！」
MIRROR緊接上場，12子歌衫以紅黑白做主色，逐一分享同快餐店嘅回憶，Edan趁機宣傳凌晨時分重播嘅港版《大叔的愛》；戴帽、留鬍鬚嘅AK則自爆細個曾參加青少年足球計劃！12子隨即帶嚟《All In One》，見早前接受手術嘅Anson Lo未有受影響，落力跳唱，respect！
軟硬終於出場啦！一見到兩位天師白馬王子look配頭盔嘅造型，就已經覺得超fun，跳唱《廣播道FANS殺人事件》，貼心改歌詞，簡直係無得輸！之後軟硬孖Eason合體，拉埋全場觀眾大合唱《麥當勞之歌》，見Eason對住兩位笑匠都不禁笑場！
咪以為軟硬 x Eason已經夠surprise！Eason喺唱《聽聽》邀請MIRROR再次出場，揭起全晚高潮！Lokman加插表演「落7」，仲撩Eason跳舞添！即刻去片感受呢個生日P有幾歡樂！
