【Viu】賀歲片《臨時決鬥》今日喺澳門舉行全球首映禮，其中5位演員古天樂、Gigi梁詠琪、Louise王丹妮、Peter陳湛文、陳慧敏出席，台灣男神王大陸亦專登嚟撐場！古天樂同Gigi指期待同觀眾一齊入戲院睇新戲，又預告嚟緊已經安排咗連場謝票，諗定好新嘅謝票方式，想知係咩？古天樂就大賣關子啦，莫非會着套財神爺裝出嚟？
古天樂有名叫做「Mr. Cool」，但就被Gigi爆佢對住魚蛋妹父愛滿瀉，唔知Mr. Cool對住小朋友會有咩招數？講講吓，古天樂笑爆指身邊有小朋友嘅親戚都好「黑心」，同佢見面前會畀小朋友睇《陰陽路》，搞到小朋友勁驚佢：「畀佢睇《明日戰記》唔得㗎咩？」咁好笑得唔得㗎？
提到古天樂喺戲中有場生撻Louise嘅戲碼，佢話事前有同武指夾過可以點樣卸力，要就力就好難啦，而當時喺現場嘅Gigi話睇到呆晒，大讚兩位超專業！另一當事人Louise指被撻完嗰個moment係feel到五臟六腑都震散晒，爬返起身都需時，咁堅係好激喎！
Peter相對嚟講就比較舒服又幸福，有兩位女神Louise、周秀娜垂涎佢嘅美色，究竟佢係點「賄賂」導演？有冇親熱鏡頭？Louise再爆Peter同娜姐影道具相時超close，Peter笑話當時係硬晒⋯軚㗎！
另外，今屆金像獎開始接受報名，古天樂以《九龍城寨之圍城》報男配角，有指係想造就林峯攞影帝，對此古天樂亦直認不諱，表明係佢自己嘅意思，同好想林峯稱帝！同時《城寨》喺亞洲電影大獎獲9項提名，古天樂指係好鼓舞，睇好伍允龍攞男配角獎！再講到現時香港電影業好難開戲，需要政府資助，古天樂又點睇呢？有足本訪問片啦！
