【Viu】Happy Fatboy’s Day！「宇宙天團」ERROR隊長肥仔梁業今日35歲啦！歌迷會日前為壽星仔喺尖沙咀租用巨型燈箱，又搞咗個生日Party慶祝，小草們仲好有心送上蛋糕、生日禮物，兼全場大合唱生日歌為肥仔賀壽，勁Sweet啊！寵粉嘅肥仔除咗跳唱新歌《Mascot》，同fans「Shake it shake it baby」之外，仲同大家一齊玩遊戲！趁住牛一，肥仔特別公開兩個「絕密數字」，佢起初話：「擔心近排漲咗啲。」但因為群情洶湧，佢唯有順應民意即場度腰圍，不過佢反而話：「最留意自己嘅胸圍，男人要有Bo⋯Body，肚腩唔犀利，胸肌都要犀利！」腰圍量度結果係43吋，肥仔突然自爆埋胸圍：「胸圍43吋，係典型嘅柱型身形，圓柱體，成碌嘢咁。」真係勁風趣！
席間，肥仔亦分享話：「好多謝大家鼓勵參與生日會，都係嗰句每年生日都好慶幸有你哋同我一齊過。自己齋出歌，如果冇你哋我都冇動力出歌，有你哋嘅支持所有騷、所有演唱會、所有歌或者所有作品，我都會好努力做俾大家睇，希望我哋每年嘅小草聚會越來越大，越來越多人，越來越開心。」佢仲約定大家出年一月見添！
肥仔又喺IG share生日感受，佢寫道：「給35歲既我講聲生日快樂，今年繼續努力。做好自己，做好每一個表演每一個作品。感謝每一個支持我嘅鍾意我嘅人，1月25號演唱會再同大家見面，thx。」
