【Viu】Fatboy@ERROR同JACE陳凱詠今日出席商場活動，又跳又唱炒熱氣氛，仲話想繼《困獸鬥》後再合作出跳唱歌，肥仔仲爆JACE未入行前已經迷倒萬千少男，成班仔狂望「Wing姐」跳舞咁話！不過，當JACE自薦做ERROR團綜嘉賓時，肥仔就用「公司規矩」嚟派檸檬，笑Cry呀！
講到全城奧運熱，肥仔話已經約咗港隊羽毛球代表「鄧謝配」食飯，理所當然係由193請客，識講一定咁講啦！佢仲預告ERROR團綜係音樂主導，唔排除「死腳膠」到時會合體，仲搞Gag話唔Mind搵埋「睇腳」嘅奧運劍擊裁判一齊玩，喂呀！如果成事真係大癲喎！
此外，問到JACE同Edan嘅合唱歌《漸漸我們》幾時正式推出？佢就搞笑咁話：「人哋依家咁忙，邊得閒出歌呀？」肥仔接力話見到Edan同明禎BB張食飯相要「喊出嚟」，想知點解就睇足本訪問啦！
