【Viu】Kaho洪嘉豪紅館騷後隔兩日就出席護膚品品牌活動「搵銀」，佢笑話呢次開騷低估咗自己嘅體力，每日瞓足「3覺」兼喪食都回唔到氣，仲要求即刻開工簡直係「捉蟲」！
講到佢喺尾場淚崩，院長詳盡解釋因由，籌備個唱實在太大壓力，所以當下有如釋重負感覺！有院友笑話見院長喊足4首歌，期間一路喊一路跳舞，有種似小朋友被媽媽逼上台表演感覺，Kaho聽到即刻笑爆嘴，又抵死自嘲喊住跳反而跳得仲好，會唔會太搞笑？
除咗多謝軒公傳授開騷秘技之外，當然感謝對方送嘅課程大禮！不過Kaho指暫時未有時間處理啲文件，好開心有呢個機會讀名校，又自誇係讀英中，所以英文good good good，唔怕唔understand！更承諾出席率會係100%，「活人鏢靶」咁上堂、絕不掛機！唔知佢會點回禮畀軒公？會再開part 2？《漁樂無窮》釣魚初體驗感受？去片睇院長妙語連珠對答！
