【Viu】現年76歲嘅姜大衛（John哥）憑《白日之下》勇奪「最佳男配角」，佢喺後台受訪時話：「成日話冇所謂，其實有所謂，有50幾年冇拎過獎，好開心！」John哥坦言看過其他對手嘅演出，估唔到自己會得獎，感激遇上《白》片，「我一世人只做過電影，我會繼續做，唔會退休！」John哥又親解愛妻李琳琳因聽力下降要戴助聽器，仲搞笑話：「所以佢唔戴時我可以鬧佢！（會唔會合作拍戲？）邊個睇呀？成150歲！各有各拍啦！」
至於「最佳女配角」由《白日之下》嘅Rachel梁雍婷奪得，佢憶述演員路嘅艱辛，仲一度哽咽話：「woo！夢想實現！」講到喺台上多謝恩師廖啟智，Rachel直言智叔教識自己點樣成為好演員，而且好錫每一個學生，提醒自己成為一個好演員，每次演出都要問心無愧。
此外，「最佳新演員」就落入《但願人長久》嘅謝咏欣手上，佢大讚吳慷仁係最好嘅爸爸，希望之後挑戰有怪癖嘅角色。而「新晉導演」卓亦謙想用10萬現金獎請Crew食飯，同埋請太太去旅行。
