【A&M Diary】你話米芝蓮推介日本嘅拉麵店，真係一啲都唔出奇。但推介一間位於香港嘅拉麵店，就知道呢間位於銅鑼灣嘅拉麵Jo一啲都唔簡單。拉麵Jo由居港嘅日本人主理，家族幾代經營拉麵店，所以拉麵Jo除咗拉麵仲有沾麵，豚骨湯底之外仲有雞白湯選擇，每一款都充滿驚喜，濃厚度滿分。
葱花牛舌
牛舌薄切，不失爽口質感。加上大量香濃嘅葱花香味，大大提升牛舌嘅層次。
雞皮餃子
一咬開餃子，雞皮嘅雞油隨即爆出，雖然邪惡，但真係好好味呀！
炸雞軟骨
雞軟骨即叫即炸，非常香脆，加上惹味嘅調味，份量十足，食唔停口。
特製低溫叉燒拉麵
叉燒鋪滿整個碗邊，愛吃肉肉的表示好興奮。至於叉燒用低溫煮理，肉質超嫩滑呢！至於拉麵係幼麵，掛上濃厚嘅醬油豚骨湯底，濃而不油，清香四溢。
雞白湯拉麵
超正！雞白湯熬到勁creamy，湯色呈乳白色，雞香味濃郁，明顯落咗心機！拉麵係用上粗麵，軟硬度啱啱好；至於配料嘅雞胸，完全唔嚡口，竟然非常嫩滑，打破雞胸一貫嘅形象。
