【A&M Diary】去芭堤雅玩，就算唔去沙灘、唔玩水上活動、唔行夜市，都唔可以唔食燒雞翼！唔知點解芭堤雅嘅燒雞翼同泰式串燒好似特別好味，想回味泰式風味，原來喺銅鑼灣都有主打泰式串燒嘅銅鑼灣Grill ขนทอง。
柚子海鮮沙律
前菜就揀咗非常開胃嘅柚子海鮮沙律，配料有大蝦、墨魚、蜆肉、青木瓜絲、柚子、腰果等，非常足料！三款海鮮都非常鮮甜彈牙，但整份沙律嘅味道來自於青木瓜絲同柚子，酸酸甜甜，非常清新！
酸辣鳳爪（杯裝）
無骨嘅鳳爪非常爽口，爽晒泰式酸辣汁，夠晒醒胃。
泰式串燒
串燒即叫即燒，上枱一刻仲係熱辣辣。我哋分別叫咗雞肉串燒、雞中翼串燒、有機露荀串燒、白鱔串燒、豬頸肉串燒。最期待嘅燒雞翼絕對無失望，雞皮燒到非常香脆，肉汁juicy；豬頸肉串燒非常嫩滑，肉質爽口；至於白鱔串燒係餐廳嘅招牌串燒，白鱔厚身，口感結實，魚肉味香濃，唔會有泥味。但講到呢到啲串燒，除咗帶有焦香味之外，最正當然係香辣嘅燒烤醬汁，非常惹味。
龍眼冰
食咗咁多串燒，就叫咗杯龍眼冰，甜度啱啱好，夠晒refreshing！
