【A&M Diary】A姐細細個住東區，佢話以前去太古城，對佢嚟講已經係好大件事！佢回憶起以前嘅海豚噴泉，依家就有人唱歌，既感動又感慨！究竟時代巨輪仲吞噬咗啲咩？同佢行完街街，喺太古城中心嘅餐廳入面，北海丼係我哋最愛嘅選擇！每日由札幌專機即日運送食材，確保新鮮。北海丼近期推出「本気盛牛肉祭」，嚴選頂級澳洲安格斯牛柳同日本鹿兒島A5和牛，一於試試。
炸蟹餅
一開始食嗰小食開下胃先，蟹餅新鮮炸起，炸到金黃色脆卜卜，最正係內裡有絲絲嘅蟹肉，好好味呀！
枝豆
枝豆爽脆微暖，上面嘅海鹽份量啱啱好，吊返枝豆嘅鮮味。
刺身五點
北海丼嘅刺身係永無失望，皆因每日清晨由專人於札幌市中央卸売市場，嚴選多款時令食材即日運送抵港，確保客人可品嚐到最鮮味嘅魚生。刺身五點分別係三文魚、吞拿魚、帆立貝、赤蝦同油甘魚。件件都係新鮮厚切，好有口感好鮮甜。而當中最鍾意係帆立貝，鮮甜腍口。
M佬之選：火炙鹿兒島A5和牛鰻魚丼
今晚嘅主角終於到啦！主廚嚴選「牛中極品」日本九州鹿兒島A5和牛嘅西冷部位，有豐富嘅油花，分佈均勻。聽經理講，黃牛嘅熔點比一般牛肉低，所以主廚先用火槍燒一吓表面，大概三成熟，就啱啱好。食落帶有微微焦香風味，有濃郁嘅和牛味之餘，仲有豐富嘅雪白油花，接近入口即溶。除咗黃牛之外，呢度個蒲燒鰻魚都非常出色，淋上自家製燒汁，令鰻魚充滿醬油鮮香。丼飯仲跟有日式溫泉蛋，蛋味香濃，撈埋落去個飯度食，正呀！
