【A&M Diary】當年讀緊大學，同學仔帶我去到尖沙咀嘅星林居酸辣米線餐廳食我人生第一碗米線，仲記得當時碗米線熱辣辣，份量又超多，啲配料多到成座山咁，重點係價錢唔貴，所以曾幾何時，喺我嘅飯堂。食食吓開始多人幫襯，想食真係要排隊等位。到後來，唔知係未成本上升，定係佢見多人食啦，加價而且份量少咗好多，服務仲要勁差！我自己同身邊嘅朋友都好多年無食，今日路過，決定比多次機會佢。
入到餐廳，大約有一半食客，店員A指示我哋兩個坐六人枱，一坐低，個店員B勁惡咁話：「乜你唔見到寫住留座嗎？見唔到六人枱嗎？」其實呢間星林居自從當年多人識咗，好似唔憂做咁，班伙計態度越嚟越差，食米線唔係要求你有咩服務，但連一個笑容或點頭都唔會有，更重要係，就算你舉手落單，店員都會扮睇唔到，一於睬你都傻。
A姐之選：雞翼+豬腩肉+豬皮明火小鍋米線（中辣、走酸、走芽、走芫荽）
無可否認，星林居最好味就係個濃郁湯底，但點解唔熱嘅！又話明火？雖則唔熱，但味道仍然係那熟悉嘅味道。而我每次都會叫豬皮，索晒辣汁真係無得輸！雞翼係會有2隻，係最抵食嘅選擇。
M佬之選：豬腩肉+蘿蔔明火小鍋米線（小辣、走酸、走蔥）
喺星林居食米線，最重要係數清楚有無俾少到餸你，因為自從當年多人幫襯，有好多人都試過漏餸，同佢講，佢都未必比番你，所以一上枱第一件事就係要睇清楚！兩個餸齊晒就無問題啦。同我嗰碗一樣，滑底都係唔熱！而星林居除咗湯底吸引，另一賣點係配料超多，鍾意食蔥同芫荽一定大愛（雖則比當年都少咗，但對比出面仍然係超多）！而蘿蔔係超甜，仍係我哋推介必點。
