【A&M Diary】以前喺香港食拉麵，湯底離不開豚骨、醬油同味噌口味，到後嚟傳入咗鹽味、白雞湯等等嘅口味，但其實喺日本，湯底嘅選擇又點止咁少呢！近期就有主打麻辣嘅拉麵由日本嚟到香港，我哋今日就去到位於銅鑼灣嘅鬼金棒。一入到餐廳，就聽到鼓樂聲，真係好似入咗地獄咁，好期待挑戰呢個地獄湯底啦。
只要掃一掃QR code，就可以睇到菜單同直接落單，你可以依照自己對麻同辣嘅程度而選擇，越級挑戰辣既唔同境界。
A姐之選：增量叉燒麻辣味噌拉麵（中辣走麻）
A姐今日保守咗，佢叫咗中辣走麻，辣度好香，認真試試個湯，仲有豚骨香味，好有層次；而A姐雖然覺得唔算辣，但鍾意呢個辣度又唔會太搶，無晒其他味道。當然另一重點就係叉燒啦，五層肉肥瘦分明，薄薄嘅脂肪唔算太油膩，充滿油香，鮮嫩同接近入口即熔。
M佬之選：芫荽辣麻味噌拉麵（小辣小麻）
呢個世界有兩種人，好鍾意芫荽同好唔鍾意芫荽，而我就屬於前者。而鬼金棒除咗主打麻辣拉麵，芫荽拉麵就係另一賣點。小辣小麻配上大量芫荽，真係好吸引同好有層次呀！除咗叉燒之外，配菜仲有玉米筍同芽菜，但值得一提係佢個芽菜，預先炒香，條條都脆卜卜同肥嘟嘟，下次嚟真係要加倍分量先得。
