【now.com】喺女仔眼中，我應該算係一個比較難溝通嘅人，尤其係新相識，情況更加慘不忍睹。
根據經驗，每逢去到新環境，我都會變得非常靜，除咗客氣說話如「多謝」、「你好」、「早晨」等等等等，甚少主動同人講嘢。唔係唔想，而係心理上覺得人哋唔識我，若然我好似好High咁衝埋去同人講嘢，最後會被當成怪人。所以若然人哋唔主動聊我傾偈，我通常唔會做主動。
不過近來我又發現，縱使別人願意做主動，我嘅反應亦未必同想法一致，而呢個狀況，甚少出現喺同男性嘅溝通上，但若然來者係女仔，我就會忽然變成話題終結者，手足無措，如果係女神，大鑊程度倍增，最後令對方尷尬或無癮離開。（除咗做雜誌訪問，因為一早準備咗開場白同題目）
早前，我同男校嘅朋友傾起呢個問題，終於得出結論。一切一切，源於長年累月嘅不快經歷，為咗保護自己，我不知不覺築起一個防護罩。
介紹返，我係一個容易鍾意人嘅人，膚淺啲講，只要對方有姿色，對我好少少，我就會產生好感，然後喺幻想中越來越鍾意對方，最終發覺只係一場誤會，發覺只係自己將別人嘅熱情當成熱愛，就會受傷。久而久之，為免不斷出現相同狀況，我身體開始自動熄機，每次回應，可能都係一句起兩句止，又或者係「係」、「唔係」、「好」、「多謝」。
我討厭自己變成咁，因為有人主動理你，其實係一件值得開心嘅事，最終卻因為我嘅笨拙及過度自我保護，令別人尷尬，實在唔好意思。所以，我嚟緊要訓練自己成為厲害嘅對答王！
獨的格言︰據經驗所得，最容易終結話題嘅說話，就係客套話及禮貌語。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
