【now.com】無論細個定而家，我都鍾意睇熱血格鬥漫畫。
記得讀大學嘅時候，有個女仔見我睇《刃牙》，就以疑惑嘅語氣問我︰「乜原來你都睇呢啲？」
冇錯，佢唔明點解一個瘦骨嶙峋嘅男仔，竟然會睇呢啲，因為大部分女仔眼中，格鬥漫畫只係純粹打打殺殺，事實當然唔係咁，但我冇解釋，一笑置之，因為我一樣唔明《小肥肥一族》有咩好睇。
儘管格鬥漫畫同超人戰隊片一樣熱血，但有一點卻係唔同的，就係後者出手，通常為咗保衛地球，若果敵人肯無條件和解，佢哋絕對唔會郁手。不過，格鬥漫畫嘅角色就唔同，即使係第一期立刻畀人打到飛天嘅茄哩啡，都係好戰的。佢哋交手，不為甚麼，而係為咗戰鬥本身，一遇強敵，當堂異常興奮，縱使畀人打到口腫臉腫，亦覺得係一種幸福。
經典熱血格鬥漫畫《龍珠》，三番四次透過孫悟空同比達，帶出呢種戰士思想。例如《人造人篇》時，佢哋其實可以預先破壞未啟動嘅人造人17號同18號，但佢哋聽到對方係強手，竟然冇咁做，因為佢哋心底裡知道，自己係生係死，亦唔及遇到一個好對手咁重要。
廣東話有句叫「冇嗰樣，整嗰樣」我由細到大冇鬥心，打乒乓波嗰陣，知道對手技不如己，就會求其打，甚至畀人哋贏。打麻雀見到一家輸咗好多錢，就會唔食佢糊。或者因為呢種性格，愛情路上，每逢得知女神身邊有一個（或以上）嘅追求者，我自然未打仗，先退縮，就算對方只係一個大叔，我亦會消失得無影無蹤。後來才發現，呢啲咪係「唔夠鍾意」嘅最佳證據，難怪女仔唔鍾意我。
其實，只要你個女神有返咁上下條件，有對手，一啲唔奇。不過，愛情從來係兩個人嘅事，未到手嘅愛情亦係一樣，若果你夠鍾意，自然唔會因為他人而放棄。
獨的格言︰只有一種人唔會輸，就係自出生就放棄愛嘅人，不過，佢同樣冇辦法贏得女神嘅愛。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
