【Now新聞台】截至早上11點，1小時內《彭博》用戶關注度上升最多的港股，依次為中國燃氣、長城汽車、國泰航空、中國銀行、中國石化。
之前喪炒氫能概念嘅中燃，突然宣布折讓配股，股價今朝一度急挫近14%，插穿29.75元配股價，半日收報28.15元，有機會錄得約10年以嚟最大單日跌幅。
中燃今次淨籌166億元，大和質疑公司現金流穩定，直指喺呢個時候配股唔尋常，加上中燃冇講明集資後會發展氫能業務，可能令投資者失望。
獨立股評人沈慶洪認同大和嘅講法，佢認為中燃股價急挫，反映投資者對中燃集資用途唔清晰感到失望，因為氫能將會係內地能源政策重點，中燃似乎未有準備發展呢項業務，令投資者憧憬落空。
