【Now新聞台】截至早上11點止，《彭博》Top Search No.1為安踏體育，第2至第5位為舜宇光學、希慎興業、李寧及吉利汽車。
美伊緊張關係降溫，大市反彈，體育用品股跑贏大市。參考摩根大通最新有關28個行業嘅報告，展望2020年，李寧仍然係行業首選。報告提到內地體育行業目前嘅兩大趨勢，第一係本土驕傲(local pride)，第二係多品牌(multi brand)，更有數據支持佢哋嘅選擇。
用數據解釋本土驕傲，可以睇百度嘅搜尋總量，比較2019年同2009年，搜尋國際本土品牌嘅比重超越咗國際品牌，顯示出消費者對本土品牌嘅信心度已經高於領先國際品牌。
至於多品牌方面，就係指品牌多樣性，相對安踏同特步國際，李寧旗下嘅品牌唔多，仍然堅持「單品牌、多類別」嘅策略。
睇返股價表現，將安踏、特步、李寧比較恒指表現，李寧的確明顯大跑贏，但今年形勢係咪一樣，投資者就要拭目以待。
