【Viu】嚟緊7月29號就係MIRROR成員Frankie 皮皮陳瑞輝嘅34歲生日！Fans Club除咗喺尖沙咀The One嘅演唱會應援區，安排咗生日主題嘅打卡佈置之外，仲籌備緊一系列生日應援活動！往年都有嘅巴士燈箱同影片廣告今年一樣有，仲多咗架皮皮主題巴士添，無論車廂內外都有皮皮嘅身影！而喺生日正日Fans Club仲安排咗雪糕車，喺尖沙咀海防道免費派雪糕幫大家消暑，希望令大家度過一個難忘嘅729啊！不過講到今年生日應援嘅重頭戲，梗係I Square一連三日嘅免費展覽啦！相信皮皮噚晚喺MIRROR演唱會上嘅真情剖白，令唔少歌迷都聽到眼濕濕，不過皮寶寶好想話俾皮皮知，喺佢哋眼中皮皮從來都唔係隱形人，一直都係閃閃發光嘅存在！佢哋都想透過今次應援俾更多人認識皮皮，令佢嘅演藝路可以更加發光發亮啊！
