【Viu】陳家樂、洪卓立(Ken)、熊黛林、周家怡及劉雅瑟等今日喺會展出席回歸劇集開播儀式。準人夫陳家樂被爆向連詩雅求婚成功後，首次出席公開活動，佢孖住Ken一齊做訪問。講到求婚成功感受，家樂話本身冇諗過咁快公開：「本身係諗住完晒手頭上嘅工作先公布，但係你哋勁啦，唔知點解會發現到，不過公開咗壓力係少咗，因為守住秘密係好辛苦。」問到求婚嘅過程？家樂話呢樣就想保留返唔講，因為係屬於佢同連詩雅嘅兩人回憶，但佢就透露自從求婚成功後，都未見過雙方家長：「求完婚我都未見過佢哋，佢哋都係睇報導先知，好彩佢哋冇詐型。」至於婚期係幾時，家樂都話暫時仲未有時間坐低傾，不過就一定唔會係今年內嘅事。
Ken同樣係認戀上劉沛蘅（Hillary）後首度出席公開活動，問到佢見到家樂咁幸福，會唔會令佢都有結婚衝動？Ken即刻話：「好戥佢開心，但係無咁快啦，暫時未諗到。」不過Ken話爸爸已經見過Hillary，仲大讚呢個新抱候選人好乖令人好開心：「真係冇咩反對聲音，都係過晒嘅。」
同場的熊黛林表示今次喺劇席要飾演個發姣靠男人生存嘅角色，仲話第一日開戲就要錫首次見面嘅李治廷，問到佢老公睇到會唔會呻醋嬲？熊黛林即話呢啲場口唔會畀老公睇到，而講到聽日父親節，熊黛林話冇特別準備禮物畀老公：「啲節日呀、生日呀我都冇準備嘢畀佢，反而係佢準備畀我。而家兩個女都好黐佢，到時叫兩個女冧下佢就得。」
