【Now Sports】喺英格蘭出戰今屆歐國盃,某大型運動品牌以比寧咸作為廣告主角(並唔係國家隊贊助商,仲要係死敵),響起Beatles嘅《Hey Jude》,有留意開近年英超都知道曼城攞聯賽冠軍,場內總會播放住呢首披頭四名曲「藍月版本」,廣告喻意比寧咸嘅出現,可令英球迷唔需要再過苦等國家隊捧盃嘅漫長日子。 撰文:沙維斯達
經過首場分組賽,唔少英球迷對比寧咸有更好感,話晒入波幫英格蘭攞晒3分,套用「軒公」張敬軒同「皇后」王菀之首《高八度》歌詞中有句:「如果好感有開關掣」,相信大部份英粉已對呢位攻擊中場早有好感。筆者都已咗呢個掣,因為今季好多次睇西甲時,見到比寧咸入楔禁區把握入波機會嘅時機捕捉之厲害,首場分組賽攻入塞爾維亞大門,做最擅長工作,或者根本係與生俱來嘅能力。
睇比數同比賽過程,應該亦有唔少人對英格蘭閂咗呢個好感掣,最大原因係領隊修夫基又喺領先局勢下,保守起嚟。老套啲講句,第1場啫,畀啲時間,睇多場再下定論都未遲,咁筆者都唔想大家咁快Mena姐上身嘅!
撰文:沙維斯達
從足球中搵下快樂同生活費