【A&M Diary】假期大家鍾意北上消費，據說香港嘅餐廳人流少咗，所以如果嗰間餐廳仍然大排長龍，相信出品應該有一定嘅質素啦！嚟到荃灣，人氣嘅餐廳唔少，其中主打泰菜嘅Ann Mamma thai kitchen by 張秀玲，食飯時間真係要有排隊嘅準備，因為餐廳嘅食物非常有驚喜架！
蝦餅、墨魚餅
外皮同樣炸得金黃色嘅兩款泰式小食，食落卻有截然不同嘅感覺：蝦餅嘅口感彈牙，食落有陣陣蝦肉嘅清甜味；墨魚餅嘅口感則偏向軟腍，食落有陣陣嘅斑斕同香茅嘅幽香。
辣椒膏炒藍青口
爆炒過嘅藍青口覆蓋住鮮紅色嘅辣椒膏，每塊青口都瀰漫住辛辣嘅感覺，但又唔會蓋骨青口嘅鮮甜味。除咗辣椒膏之外，青口仲用上炸蒜頭粒一齊爆炒，滋味又有層次。
泰式燒豬頸肉
肥美嘅豬頸肉裙邊燒得焦脆，沾上特製嘅酸辣醬之後，令肉汁充沛嘅豬頸肉除左炭燒嘅煙熏味外，非常惹味。
黑椰椰
港式茶餐廳有「黑牛」，張秀玲呢度就有「黑椰椰」，椰子嘅清香同濃烈嘅椰奶味冇沉沒於可樂霸道嘅甜味，可樂飲落口仲同椰香味互相呼應，帶來一份爽胃醒神嘅感覺。
