【A&M Diary】每次去完日本，都會對各種海鮮、魚生、刺身念念不忘，嗰種有餘韻嘅鮮甜味，真係好想成日回味！位於東涌嘅日本橋海鮮丼つじ半TSUJIHAN，品牌屬於日本嘅過江龍，食材由日本每日新鮮空運送到，非常新鮮，好輕易就可以品嘗東瀛最鮮味。
豪華海鮮丼
稱得上係豪華海鮮丼，三文魚、油甘魚、帆立貝、吞拿魚赤身等都有齊！而最搶眼嘅係大大隻嘅牡丹蝦同海量嘅鯡魚子，份量之多，令畫面非常震撼。牡丹蝦非常新鮮，彈牙又有膠口嘅質感；鯡魚子超鮮甜，爽脆嘅口感，令鮮味喺口腔迴盪。
特上海鮮丼
一丼二食嘅特上海鮮丼，魚生飯上有更高級嘅海膽、鮭魚籽同紅鱈蟹肉。建議用紫菜將海膽同鮭魚籽包好，軟綿嘅海膽、鮮甜嘅鮭魚子加上紫菜嘅脆香，令到口感同味道更加豐富。二食嘅主角係鯛魚高湯，將高湯加入丼飯中，再拌上蔥花同埋柑橘皮，當魚香遇上水果嘅芳香，令濃味嘅湯頭帶著一份清爽，再混合埋浸過魚湯嘅刺身同蔥花一齊食，鮮甜同滿足感都去到最高點呀！
