【A&M Diary】自從買咗車之後，真係香港零距離！想去火炭食沙田雞粥定去深井食燒鵝，真係揸住1064話去就去。今日問A姐想去邊度食飯，佢話不如入大尾督食泰國菜喎，so easy，一於帶埋1064去啦！大尾督除咗燒嘢食出名，其實都有好多泰國餐廳選擇，雖然大部份都無提供車位，但大尾督就有勁多咪錶停車位，泊車無難道啦！而我哋就嚟到忠誠茶座泰國菜，嘆一個泰國大餐，味道整體唔錯，但略嫌份量唔多。
冬陰功
湯大概有3-4碗，酸辣度適中，好惹味。湯入面有3大隻蝦、菇同唔同嘅香料，仲有火熱住保溫，好味。
沙嗲豬肉串
豬肉唔會燒得過燶，仲帶有焦香味！當然食串燒嘅重點就係個沙嗲汁，濃香十足。
辣荳醬炒通菜
通菜炒得好香口，辣荳醬好香，份量啱啱好，又唔會太辣。
清邁咖喱雞
雖然餐牌上寫有3個辣椒，但我哋覺得一啲都唔辣，仲略嫌個汁太稀。而且雞嘅份量唔多，呢個真係可以唔洗叫。我哋另外order咗蒜蓉包配呢個咖喱雞，個蒜蓉包真係好吸引，又脆蒜蓉味又香。
炒泰國金邊粉
全晚份量最多就係呢個炒泰國金邊粉，鑊氣十足又唔會太油，好滿足。
原隻菠蘿海鮮炒飯
菠蘿海鮮炒飯即叫即炒，好夠鑊氣！配料有肉鬆、提子乾、蝦、魚同青口。當然唔少得重點嘅菠蘿啦，酸酸甜甜好開胃㗎！
