【A&M Diary】大埔嘅餐廳一向平實，以街坊生意為主，價錢sell親民抵食！而作為大埔街坊，呢間主打東南亞菜嘅暢和號成為我哋嘅飯堂！餐廳開咗半年左右，口碑唔錯架，餐廳嘅招牌菜當然唔少得海南雞，所以我哋向美味啟航啦！講到抵食又想咩都食吓，叫個二人餐就啱晒。
滷水牛肚絲
套餐嘅小食，份量依然十足！牛肚絲吸收曬滷水嘅精華，極具層次。
生炸香茅雞翼
雞翼即叫即炸，上枱時仲係超熱超香口。雞翼大大隻，一咬落去超juicy！配上泰式酸辣汁，就更惹味開胃。
椰子冬瓜清雞湯
湯底帶有淡淡椰子香味，雖然鷄味香濃，但無多餘嘅雞油，絕對係清香味濃。
暢和招牌海南雞
海南雞係暢和號嘅招牌，而二人餐竟然有成半隻，份量十足，夠晒抵食！無骨嘅海南雞，啖啖肉，雞肉好嫩。當然唔少得沒南雞必備嘅三款醬汁：帶甜嘅黑醬油，傳統嘅黃薑油同埋香口嘅蒜蓉汁，一次過帶俾你三個唔同嘅口味！
香料雞油飯
食海南雞又點少得雞油飯呢！每粒飯都係金黃色，加上淡淡嘅雞油香味，真係要添飯呀！
參巴醬菠菜
參巴醬係一種廣泛流行於東南亞以至南亞地區嘅一種特殊辣椒醬，菠菜軟身可以輕而易舉地掛上參巴醬汁，入口即時感受到參巴醬嘅惹味香辣。
泰式椰汁西米糕
二人餐嘅甜品係椰汁西米糕，椰汁同西米比例係黃金嘅一比一，十分足料。椰香豐富，味道唔會太甜，係一個完美嘅晚餐！
