【A&M Diary】人哋話屯門特別多牛，難得今日小編JP嚟到屯門，真係要搵吓牛牛先得。見到呢間主打石板燒嘅六百田 ，雖然舖頭細細，但提供唔同國家嘅牛扒，好似有紐西蘭、澳洲、日本、美國等地嘅選擇，原來屯門特別多牛呢個傳聞係真㗎，完全考起有選擇困難症嘅我地呀！
自取區
六百田嘅湯、白飯、沙律都係自助式，份量可以根據大家嘅食量去拎，咁就唔怕會食唔飽啦！而且大家可以根據牛扒熟度去要求店員更換石板添！
紐西蘭西冷配帆立貝
西冷肉質鮮嫩，一切落去就有滿滿嘅肉汁流出嚟，而且牛味濃郁！店員會提供鹽、黑椒、燒汁俾你自己去調味，但我哋只係落咗少少鹽同胡椒就覺得夠晒，因為靚嘅扒係唔需要用太多調味料，否則會遮蓋咗肉汁。帆立貝雖然唔算大粒，但十分鮮甜。
板燒美國CAB牛板腱配帶子
牛板腱喺一般扒房都比較少見，其實佢係類似牛展嘅牛扒，會有少少筋腱。肉味雖然無西冷咁濃，但比較有咬口。帶子尚算大粒，加上少少黑椒，帶出鮮味。
楊枝甘露特飲、西瓜冰冰
兩杯嘢飲都非常解渴清爽，冰粒仲會有唔同形狀，非常可愛，啱曬打卡呀！
