【A&M Diary】好多人都話掛住以前嘅香港，回憶那段年月有多好。講到回憶，仲記得以前去茶樓飲茶食點心嗎？以前食點心唔係剔紙仔，仲會有姨姨推住架點心車叫賣，如果你都試過呢種飲茶嘅體驗，咁絕對係暴露年齡喇！依家仲有點心車嘅老香港傳統酒樓買少見少，想回憶嗰種飲茶嘅氣氛，可以嚟到中環嘅蓮香樓。
香港嘅蓮香樓，已經接近一百年歷史，依家位於中環威靈頓街嘅蓮香樓已經係第三代地址。蓮香樓保留咗唔少傳統嘅裝潢，好似天花就有好多雀籠，真係充滿好多回憶。其實除咗中環嘅蓮香樓，喺上環同荃灣都設有姊妹分店：蓮香居、蓮香棧。上次曾經去過上環蓮香居飲下午茶（詳情），今次嚟蓮香樓飲早茶，唔知係咪早茶嘅關係，覺得蓮香樓嘅點心比蓮香居新鮮同好食。
蓮香樓仲有製作唔少香港傳統嘅點心，好似臘腸卷、豬肚燒賣、鵪鶉蛋燒賣等等，對於年青一輩嘅我哋嚟講，呢啲懷舊嘅點心卻帶俾我哋一份新鮮感。
糯米雞
超大隻，勁足料！糯米非常軟腍，帶有淡淡嘅荷香味，配料有雞肉、叉燒、鹹蛋黃、冬菇等等，好入味，夠晒飽肚！
魚肚札
魚肚札我哋都係第一次食，首先腐皮入邊包住豬肉、蝦同魚肚。話明魚肚咋，呢塊魚肚非常厚身，索晒汁，好好味！
燒賣
新鮮出籠嘅燒賣真係好好味呀！入面有粒粒大蝦，勁彈牙，新鮮熱辣，超好味！
