【A&M Diary】超驚喜嘅自助餐呀！話說，香港人嘅生日、紀念日、母親節同父親節等等嘅慶祝節日都好鍾意搵間酒店嘆自助餐，所以嚟到我哋嘅週年紀念日，我哋就揀咗位於尖沙咀海港城嘅太子酒店SAVVY，SAVVY全新裝修，環境舒適，而呢度嘅週末自助早午餐選擇除咗海鮮同好多驚喜嘅pass around食物之外，每位成人同行嘅1位11歲或以下之小朋友仲可享免費用餐優惠添，性價比超晒班呀！
SAVVY
位於尖沙咀海港城太子酒店嘅SAVVY，近期翻新重開後，一直都喺我哋嘅bucket list之內，因為餐廳充滿格調，氣氛環境唔錯。至於SAVVY主要分為三個部份：酒吧、酒廊同我哋今次食自助餐嘅餐廳。平日嘅SAVVY提供半自助餐，而我哋今日就食週末嘅自助早午餐，餐廳分為唔同區域，有海鮮、沙律冷盤、餐湯、切肉熱葷、甜品等等之外，仲會由店員以pass around形式嘅精選食物。SAVVY會不定期更新菜單，而今日就有唔少泰國同印度菜式，一解我哋久久嘅旅行癮。
SAVVY週末自助早午餐：海鮮
講到食自助餐嘅回本之選，又點少得海鮮呢！呢度嘅海鮮有龍蝦、麵包蟹、青口、小龍蝦、大蜆。龍蝦預先開邊，肉質彈牙，仲有唔少膏，非常鮮甜！除咗龍蝦，大蜆係我哋瘋狂encore嘅海鮮！SAVVY嘅大蜆預先加入咗秘製醬汁調味，同平時自己加上cocktail sauce嘅食法好唔同，味道好有層次，突出大蜆嘅鮮甜味！
SAVVY週末自助早午餐：沙律冷盤
SAVVY嘅沙律冷盤選擇非常多，除咗沙律菜之外，仲有廚師特調嘅沙律，例如欖菜肉鬆沙律，當然仲有唔少得泰式主題嘅泰式扎肉沙律同泰式海鮮沙律，好fresh呀！
SAVVY週末自助早午餐：餐湯
今日嘅湯有兩款，分別係南瓜忌廉湯、南北杏節瓜豬骨湯。我哋每人飲咗兩碗南北杏節瓜豬骨湯，因為勁足料又無味精感覺，啱晒平時少湯水嘅我哋。
SAVVY週末自助早午餐：切肉熱葷
SAVVY嘅熱葷取餐區設計成開放式廚房，等大家可以近距離欣賞到廚師嘅功架，但最大嘅賣點係，廚師會不斷翻熱食物，讓食物保持最新鮮熱辣嘅溫度。至於食物選擇有京燒銀雪魚、紅酒燴羊肉、燉雜菜、胡椒炒蟹、印尼炒飯配沙嗲、印度烤雞、印度蝦咖喱、泰式豬頸肉黃咖喱、泰式青咖喱雞、叉燒菜心炒飯等等。特別一讚係SAVVY自助早午餐提供嘅印度菜，全部都係由印度廚師即叫即做，充滿風味！另外，千祈唔好笑我，因為我食咗兩大碗叉燒菜心炒飯。雖然話自助餐好少食飯，但呢個叉燒菜心炒飯夠晒鑊氣，非常足料，超級超級好味！切肉就係即切烤牛肉，牛肉嘅火候控制非常好，肉質嫩滑，肉味濃郁！
SAVVY週末自助早午餐：Pass Around
所謂Pass Around，即係店員以循環不斷嘅方式，將新鮮即製嘅食物送到去你餐枱前。好似今日就有芝士焗扇貝、燒大頭蝦、炸素春卷等等。我哋都非常欣賞呢個上菜模式，除咗食物夠新鮮之外，店員仲會同你交流，加添自助餐少見嘅互動。除咗熱食，Pass Around仲有甜品，除咗啱晒打卡嘅火焰芝士蛋糕，仲有期間限定嘅Häagen-Dazs雪條，大家可以加上Oreo碎或杏仁碎，加添口感。
SAVVY週末自助早午餐：甜品
SAVVY嘅甜品選擇好多，分別有巧克力布朗尼、士多啤梨覆盆子慕絲蛋糕、藍莓芝士餅、抹茶白朱古力蛋糕、Oreo芝士蛋糕、雲呢拿酥皮蛋糕、熱帶水果芝士蛋糕同朱古力榛子蛋糕等等，件件精美，可以自行製作一個high tea set啦！
